Traditional Cane Crafts in Ilumbakanda Village, near the Sinharaja Rain Forest
සාම්ප්‍රදායික වේවැල් කර්මාන්තය
සිංහරාජ වනාන්තරයේ නැගෙනහිර බෑවුම ආශ්‍රිත
ඉලුඹකන්ද ගම්මානය ඇසුරින් සිදු කරන ලද අධ්‍යයනයක්
ලෝක උරුමයක් වශයෙන් යුනෙස්කෝව විසින් නම් කරන ලද සිංහරාජය වැසි වනාන්තරය ජෛව කෞතුකාගාරයක් බඳු වේ. ජෛව විද්‍යාත්මකව සිංහරාජය පිළිබඳ නිරන්තරයෙන් විද්වතුන්ගේ අවධානය යොමු වුවද, එහි මානව ක්‍රියාකාරකම් පිළිබඳ අධ්‍යයනයන් ඉතා සීමිත ය. ශ්‍රී ලංකාවේ පවතින නෛතික රාමුව නිසා වනාන්තර ආශ්‍රයෙන් යැපීමට හුරු වූ මිනිස් කොට්ඨාසයන්ගේ ක්‍රියාකාරිත්වය යටපත් වුවද වර්තමානයේ පවා එහි සේයාවන් හදුනාගත හැකි ය. ඒ අනුව සිංහරාජ වනාන්තරය ආශ්‍රිත සිදු කරන ලද සාම්ප්‍රදායික කර්මාන්තයන්ගේ තොරතුරු සමූහයක් ක්‍ෂේත්‍ර අධ්‍යයනයේ දී හමු විය. ඒ අතරින් ඉලුඹකන්ද ගම්මානය ආශ්‍රිතව පැවති වේවැල් කර්මාන්තය සුවිශේෂී ලක්ෂණ ඉස්මතු කරනු ලබයි. වර්තමානයේ වියැකී යන මෙම කර්මාන්තය, ජීවන තත්ත්වය ඉහළ නංවා ගැනීමේ වෑයමකට වඩා එදිනෙදා අවශ්‍යතා සම්පූර්ණ කර ගැනීමේ ප්‍රයත්නයක් වශයෙන් හඳුනාගත හැකි විය. දිවයිනේ නන්දෙස වේවැල් කර්මාන්තය පැවතුනද, වර්තමානයේ ඉලුඹකන්ද ගම්වාසීන් මෙම කර්මාන්තයෙහි නියැලෙන්නේ ඉතා සීමිත වශයෙනි. ක්‍ෂේත්‍ර අධ්‍යයනයේදී හමු වූ තොරතුරු අනුව මෑත අතීතයෙහි ඉලුඹකන්ද ගමෙහි සියල්ලන්ම පාහේ මෙම කර්මාන්තය සඳහා නිපුණයන් ව සිටි බව පසක් වේ.
